The EHU Times

КінаКаляды48 — гэта чэлендж для ўдзельнікаў і ўдзельніц любой падрыхтоўкі, якія хочуць прымяніць свае навыкі ці паспрабаваць упершыню напісаць сцэнар, зняць, зрабіць гук і зманціраваць гатовы калядны гульнявы караткаметражны фільм за 48 гадзін.

Працы ўдзельнікаў былі паказаны ў віленскім кінатэатры Pasaka 23 снежня. Амаль уся кіназала была запоўнена: гледачы сядзелі ў чаканні выніковых фільмаў каманд. Дарэчы, асноўнай тэмай для фільмаў выступалі Каляды. Таму працы прадэманстравалі не толькі прафесійныя элементы здымак і мантажу, але і магічнасць атмасферы. Каза, Зорка на кіі, песні і варажба — каманды справіліся з задачай на 100 адсоткаў!

Праграма конкурсу уключала 3 прызавыя месцы з грашовым бонусам, а таксама прыз глядацкіх сімпатый. Усяго ў КінаКалядах48 прынялі ўдзел 14 кінапрац. Але, як і ў любым спаборніцтве, былі свае пераможцы. Імі стала каманда студэнтаў Еўрапейскага гуманітарнага ўніверсітэта SOC (Sort Of Cinema) з фільмам «А хто Алеська?». Другое і трэцяе месца занялі каманда «Арліна моладзь», фільм «Зорка, якая ўпала пад Каляды» і каманда «Vdoh» з фільмам «Боязь» суадносна. Глядацкую сімпатыю заваявала таксама каманда SOC.

Як прыйшла ідэя фільма, што натхняла? Як праходзілі здымкі? Якія складанасці былі? Што адчувалі ўдзельнікі падчас здымак і прагляду? Даведаемся ў саміх пераможцаў!

Ліза, прадзюсерка/менеджэрка: Я падчас здымак была ў Парыжы і працавала з сябрамі анлайн. У мае абавязкі ўваходзіла ўсіх сабраць, пазнаёміць і наладзіць працэс працы. І з гэтым выйшла ўсё цудоўна! Цяжкасць была ў тым, што я была онлайн, і было цяжкавата заўсёды на 100% ведаць, што адбываецца ў каманды. Але вынікам я вельмі задаволеная, мне здаецца, што выйшла даволі стыльна, яшчэ і пацешная гісторыя.  Натхняліся Калядамі і візуальнымі вобразамі. Хацелі паказаць гэтае свята ў незвычайным ракурсе. Яшчэ калі прыдумлялі ідэі для фільма, натхняліся вобразамі і творчасцю Шумы і Iva Sativa.

Света, сцэнарыстка/мастачка/актрыса: Ідэю мы прыдумлялі ўсёй камандай. Нам хацелася зняць нешта этна-сучаснае, каб асноўная аўдыторыя магла сябе асацыяваць з тым, што адбываецца, і адначасова адчуваць беларускую культуру па-свойму. Мы выдатна правялі час, сабралася цудоўная каманда, якая гарэла працэсам. Усе былі расслабленыя, падтрымлівалі адзін аднаго і вельмі шмат весяліліся і смяяліся. Па выніку ў прынцыпе і відаць, што мы добра спрацаваліся і злавілі агульную хвалю.

Аляксей, аператар-пастаноўшчык: Паколькі нам выпала па жрэбію працаваць у жанры мак’юментары, у галаву адразу ж прыйшло некалькі карцін/серыялаў, напрыклад, «Ведзьма з Блэр» і «Офіс». Аднак асноўным арыенцірам усё ж стаў праект «Чым мы занятыя ў цені»: спантанная камера і знарочыста бюджэтная манера здымкі вельмі добра падкрэслівала камедыйны дух серыяла. Гэта нам і трэба было!

Сярод усіх цяжкасцяў, я, як аператар-пастаноўшчык, вылучыў бы менавіта працу са святлом. Праз дынамічны малюнак і вялікую колькасць персанажаў ва ўсіх сцэнах, было вельмі цяжка паставіць святло так, каб яны не патрапілі ў кадр у працэсе руху, і каб героі засталіся досыць падсвечаны. Не магу сказаць, што мне ўдалося дамагчыся жаданага выніку, але ва ўмовах абмежаванага часу і абсталявання атрымалася, як мінімум, перадаць атмасферу.

Але ніякія складанасці не перашкодзілі SOC зрабіць сваю ідэю крута! Яскравасць свята, этна-сучасная атмасфера, колеры і не толькі — фільм заслужана заваяваў не толькі ганаровую грамату і грашовы прыз, але і глядацкія сэрцы! Віншуем каманду праекта з перамогай і жадаем натхнення ў наступных працах!

Паглядзець яшчэ больш прац SOC можна тут

Таксама дзякуем арганізатарам КінаКаляд48: ініцыятарка і прадзюсарка Надзея Ількевіч, каманда Creat Culture Group — Таццяна Штэйнбук, Ліза Шалай, Мікіта Суботкін, валанцёрка па камунікацыях Арына Бокач (ЕГУ).